Denar Biba, kreu i Autoritetit të Konkurrencës, i cili sapo ka rikonformuar pozicionin e tij në prill të këtij viti, ka zgjedhur sallën e Komisionit të Ekonomisë për të shpallur një standard të ri të funksionimit të shtetit: atë të pavarësisë absolute nga çdo lloj kontrolli, përfshirë edhe vetë Kuvendin që e emëron.
Gjatë raportimit vjetor të së hënës, Biba nuk la vend për ekuivoke. Me zë dhe me figurë, ai u bëri të qartë deputetëve se institucioni që ai drejton nuk ka ndërmend t'i japë llogari askujt për vendimmarrjet e tij, duke sfiduar hapur Kontrollin e Lartë të Shtetit.
Përplasja ka lindur nga kërkesa e KLSH-së për të audituar dosjet dhe vendimet e Autoritetit të Konkurrencës. Por për Bibën, ky nuk është një proces normal ligjor, por një "atentat" ndaj autonomisë së tij.
“Erdhi KLSH tek ne dhe kërkoi çdo lloj informacioni konfidencial dhe sekret për të kontrolluar mbi vendimmarrjet tona. Në vlerësimin tonë, kjo përbën cënim të pastër të pavarësisë së institucionit,” u shpreh ai para deputetëve, duke vendosur një vijë të prerë ndarëse.
Ajo që bie sy në këtë qëndrim nuk është thjesht refuzimi i KLSH-së, por perceptimi që kreu i Autoritetit ka për vetë Parlamentin. Pasi mori votat e nevojshme për të qëndruar në detyrë deri në vitin 2031, Biba u kujtoi deputetëve se roli i tyre kontrollues mbaron në momentin që shtypin butonin e votimit.
“Nuk mundet një institucion i pavarur, në këtë rast KLSH, apo edhe Kuvendi i Republikës, përveçse si retorikë politike, të thotë që kjo vendimmarrja juaj është kështu apo ashtu. Nëse na keni mandatuar, keni besuar tek ne, tek profesionalizmi ynë”, tha ai.
Për Bibën, i vetmi autoritet që mund të shohë letrat e tij është Gjykata. Çdo institucion tjetër, përfshirë organin më të lartë legjislativ në vend, duhet të qëndrojë jashtë kësaj kështjelle.
Kjo lloj mendësie ku zyrtari publik e konsideron veten "mbi palët" dhe imun ndaj verifikimeve institucionale, do të kishte një lloj peshe nëse tregu shqiptar do të vuante nga tepria e rregullit dhe e garës së ndershme.
Që prej vitit 2021, nën drejtimin e Bibës, Autoriteti i Konkurrencës ka pasur një bilanc mjaft modest në terren. Monopolet dhe oligopolet në sektorët jetikë të ekonomisë kanë vazhduar të operojnë të qeta, duke diktuar çmimet në kurriz të qytetarëve, pa ndonjë ndërhyrje madhore apo penalizim që do të ndryshonte rregullat e lojës.
Megjithatë, mungesa e rezultateve konkrete në treg nuk e pengon kryetarin të kërkojë paprekshmëri totale në zyra. Përderisa suksesi përballë monopoleve është i vështirë për t'u arritur, është shumë më e thjeshtë të mbyllen dyert dhe të shpallet "pavarësia" nga çdo lloj kontrolli shtetëror.
