Seanca parlamentare u shoqërua me tensione dhe thirrje nga deputetët e Partisë Demokratike, të cilët përsëritën në sallën e Kuvendit sloganin “Rama, jep dorëheqjen”, të njëjtin refren që është dëgjuar edhe në protestat e fundit qytetare.
Ironikisht, debati u zhvillua ndërsa fjalën e kishte Ulsi Manja, i cili deklaroi se Edi Rama nuk do të largohet dhe se do të mbetet kryeministër deri në vitin 2029, kur pritet të mbahen zgjedhjet e ardhshme.
Por si Manja, ashtu edhe deputetët e PD-së, duket se ende nuk e kanë kuptuar mesazhin kryesor të protestës. Ajo nuk është thjesht kundër Edi Ramës. Ajo është një protestë kundër mënyrës se si është bërë politika në Shqipëri për dekada me radhë, kundër një klase politike që qytetarët e shohin si pjesë të të njëjtit problem.
Në shesh nuk dëgjohet vetëm “Rama në burg”. Dëgjohet po aq fort edhe “Berisha në burg”. Ky është refreni që po injorojnë si mazhoranca ashtu edhe opozita.
Sa për deputetët demokratë, ndoshta do të ishte më e ndershme të shkonin në shesh dhe të dëgjonin çfarë po thonë protestuesit, sesa të shfaqen aty si ekskursionistë politikë. Sepse kori që po dëgjohet prej ditësh nuk këndon vetëm kundër qeverisë. Ai këndon kundër të gjithë atyre që qytetarët i konsiderojnë përgjegjës për gjendjen ku ndodhet vendi.
