Kreu i grupit parlamentar të PD-së, Gazment Bardhi, reagoi pas operacionit të madh të SPAK-ut duke e cilësuar atë si një nga goditjet më të mëdha ndaj krimit të organizuar dhe pastrimit të parave. Në reagimin e tij të gjatë, Bardhi kujtoi denoncimet e opozitës ndër vite, projektligjet e rrëzuara nga mazhoranca, interpelancat me Edi Ramën dhe akuzat për përdorimin e sektorit të ndërtimit për pastrim parash.
“Prandaj, sot nuk është dita për të bërë bilancin e arrestimeve të paralajmëruara, por për të kërkuar llogari se përse nuk hetohet përgjegjësi kryesor që e ktheu Shqipërinë në parajsën e pastrimit të parave përmes lejeve të ndërtimit”, shkruan Bardhi, duke kërkuar që SPAK të hetojë kryeministrin Edi Rama dhe zyrtarët që sipas tij kanë lehtësuar këtë fenomen.
Madje, Bardhi kujton edhe deklaratat e tij të mëparshme, ku përmend me emër Artur Shehun, duke pretenduar se ai ka përfituar leje ndërtimi dhe investime publike.
Megjithatë, mes gjithë këtij reagimi ku deputeti demokrat i tregon SPAK-ut se ku duhet të kërkojë, kë duhet të hetojë dhe ku ndodhen përgjegjësitë politike, mungon një emër që figuron në dosjen e operacionit të sotëm: Ilir Shtufi.
Nëse lexohet reagimi i Bardhit, krijohet përshtypja se SPAK-ut i duhet vetëm të ndjekë udhëzimet e opozitës për të zbuluar të vërtetën. Por ndërsa lista e emrave që ai përmend është e gjatë, një nga emrat e dosjes së sotme duket se ka mbetur jashtë vëmendjes së tij.
Ndoshta është thjesht një harresë. Ose ndoshta disa emra përmenden më lehtë se të tjerët.
