Ka nisur ceremonia e 35-vjetorit të Partisë Socialiste në Sheshin “Italia”, ku kryeministri dhe kryetari i PS-së, Edi Rama, po mban fjalën e tij para të pranishmëve.
Aktiviteti zhvillohet brenda një perimetri të rrethuar sigurie, ku janë mbledhur drejtuesit më të lartë të socialistëve, deputetë, ministra dhe mbështetës të partisë. Rama është i vetmi folës i parashikuar në këtë aktivitet, ndërsa gjatë ceremonisë po transmetohen edhe materiale filmike kushtuar 35 viteve të Partisë Socialiste.
Në aktivitet nuk është lejuar prania e mediave brenda zonës së rrethuar, ndërsa masat e sigurisë kanë qenë të shtuara. Gjithashtu, lokalet dhe baret në anën e stadiumit “Air Albania” janë mbajtur të mbyllura gjatë zhvillimit të ceremonisë.
Përvjetori i 35-të i PS-së zhvillohet në një klimë të tensionuar politike, pasi vetëm pak qindra metra më larg pritet të nisë protesta e qytetarëve që kërkojnë largimin e kryeministrit Edi Rama.
