FIFA ka vendosur të shpërblejë klubet që lejojnë lojtarët e tyre të marrin pjesë në FIFA World Cup 2026, duke vënë në dispozicion një fond rekord prej rreth 355 milionë dollarësh.
Në kuadër të programit “FIFA Benefits”, çdo klub do të përfitojë të paktën 5 mijë dollarë në ditë për secilin futbollist të grumbulluar nga kombëtarja e tij gjatë turneut.
Përveç kësaj shume bazë, FIFA do të shpërndajë edhe bonuse shtesë, të cilat do të llogariten në varësi të numrit të ndeshjeve dhe minutave të luajtura nga secili futbollist në Botëror.
Sipas FIFA-s, shuma përfundimtare që do të marrë çdo klub do të përcaktohet vetëm pas përfundimit të kompeticionit, pasi të jenë analizuar të gjitha të dhënat që lidhen me pjesëmarrjen e lojtarëve.
Fondi i dedikuar për klubet paraqet një rritje të konsiderueshme krahasuar me atë të ndarë gjatë 2022 FIFA World Cup në Katar. Rritja vlerësohet në rreth 70 për qind, duke reflektuar përpjekjet e FIFA-s për të kompensuar më mirë klubet që kontribuojnë me lojtarë në aktivitetet e ekipeve kombëtare.
Gjithashtu, pothuajse një e treta e fondit total është rezervuar për periudhën e ndeshjeve kualifikuese, duke zgjeruar për herë të parë përfitimet financiare edhe për klubet që lirojnë futbollistët gjatë fazës eliminatore të Botërorit.
