Një përplasje e re ka shpërthyer mes Federatës Franceze të Futbollit dhe ekipit kombëtar, pas përdorimit të imazhit të disa lojtarëve për qëllime komerciale, përfshirë kapitenin Kylian Mbappe.
Sipas raportimeve të “L’Équipe”, pakënaqësia e lojtarëve është shkaktuar nga një reklamë e kompanisë së basteve online Betclic, ku shfaqen pesë futbollistë të përfaqësueses franceze: Mbappe, Michael Olise, Ousmane Dembele, Desire Doue dhe Rayan Cherki. Reklama është publikuar para ndeshjes miqësore ndaj Bregut të Fildishtë.
Burimet theksojnë se lojtarët nuk ishin informuar për mënyrën e përdorimit të materialit të fotosesionit, duke shkaktuar reagime të forta brenda grupit, me Mbappe dhe Cherki mes më kritikëve.
Çështja lidhet me marrëveshjen e vitit 2023 mes lojtarëve dhe Federatës Franceze, e cila përcakton rregulla për përdorimin e imazhit të futbollistëve dhe sponsorëve zyrtarë. Sipas avokates së lojtarëve, ekziston rrezik për dëmtimin e imazhit të tyre përmes bashkëpunimeve me kompani të lojërave të fatit.
Megjithëse Federata ka respektuar disa pika të marrëveshjes, si përfshirja e të paktën pesë lojtarëve në fushata të tilla, mbeten ende çështje të hapura, përfshirë bonuset e Kupës së Botës dhe numrin e biletave për familjarët e lojtarëve.
Me afrimin e turneut dhe nisjen drejt Shteteve të Bashkuara, palët pritet të kërkojnë një zgjidhje për të shmangur përshkallëzimin e mëtejshëm të konfliktit.
