Një vatër e madhe zjarri është shfaqur disa orë më parë në pyjet e fshatit Mamëz, në Kukës. Era e fortë po ndihmon në përhapjen e flakëve, ndërsa retë e dendura të tymit janë zhvendosur deri mbi qytetin e Kukësit, duke shkaktuar shqetësim tek banorët.
Në terren janë angazhuar ekipe emergjence, përfshirë shërbimin zjarrfikës, administratën pyjore dhe banorë të zonës, të cilët po përpiqen të ndalojnë përparimin e flakëve.
Për shkak të terrenit të vështirë, automjetet zjarrfikëse nuk mund të hyjnë në zonë, ndaj ndërhyrja po bëhet me mjete rrethanore dhe pompa shpine.
Deri më tani nuk dihen shkaqet e zjarrit, por raportohet se janë djegur disa hektarë me pyje dushku.
