SPAK ka dërguar për gjykim 29 të pandehur në lidhje me një skemë të dyshuar abuzimi me tenderë publikë në Universitetin Bujqësor të Tiranës (UBT), për procedura të zhvilluara gjatë vitit 2022 me një vlerë totale 90 milionë lekë.
Në këtë dosje penale, janë përfshirë 27 zyrtarë të UBT-së, mes tyre drejtues të lartë dhe anëtarë të komisioneve të prokurimit, si dhe dy përfaqësues të operatorit ekonomik “Krijon” sh.p.k, të cilët akuzohen për falsifikim dokumentesh në bashkëpunim.
Sipas Prokurorisë së Posaçme, hetimet e zhvilluara me metoda speciale (përgjime, vëzhgime dhe sekuestrime dokumentesh) kanë zbuluar se një grup zyrtarësh të UBT-së, mes tyre zëvendës/rektorët Romina Koto dhe Ilir Kapaj, si dhe administratori Edmond Tërthorja, kanë hartuar projekte me të dhëna fiktive, në bashkëpunim me operatorët ekonomikë që më pas janë shpallur fitues.
Tenderët janë zhvilluar në mënyrë të fiktive, pas marrjes paraprake të pajisjeve apo shërbimeve nga subjektet përfituese. Operatorët ekonomikë të përfshirë – “Krijon” sh.p.k, “Zero Group” sh.p.k dhe “Malvina Visoka PF” – kanë dorëzuar oferta të falsifikuara në emër të shoqërive të tjera, me qëllim fryrjen e fondit limit, pa u kryer asnjë studim tregu real.
Në skemën e dyshuar janë përfshirë edhe dhjetëra zyrtarë të tjerë të prokurimit dhe komisioneve vlerësuese, përfshirë: Amarildo Lleshi, Mehmet Qoshja, Altin Murto, Enkeleida Sallaku, Klara Jahollari, Agim Sefa, Arjan Buliqi, Serafin Skënderi, Ilir Kusi, Dritan Laçi, Azem Parllaku, Artur Koleci, Radion Dhromi, Blenard Spaho, Tedi Proda, Erjola Kopali, Klea Lekoçaj, Etleva Shore, Mimoza Shehu, Elvira Shtogu dhe Tone Vukaj.
SPAK thekson se hetimet vazhdojnë në kuadër të procedimit penal nr.13 të vitit 2022, për të evidentuar të gjitha faktet penale të tjera dhe për të identifikuar çdo përgjegjës tjetër të përfshirë në abuzimet me fondet publike dhe falsifikimet në procedurat e prokurimit.
