Një tentativë për trafik të paligjshëm emigrantësh drejt Mbretërisë së Bashkuar është zbuluar dhe ndaluar nga një operacion i koordinuar mes Agjencisë Kombëtare të Krimeve të Britanisë (NCA), Forcave Kufitare britanike dhe autoriteteve franceze.
Operacioni çoi në ndalimin e një jahti në brigjet e Isle of Wight të dielën pasdite, më 20 korrik. Mjeti lundrues, që ishte nisur nga veriu i Francës, u identifikua nga autoritetet britanike dhe u shoqërua drejt marinës së Gosport në Hampshire nga një anije patrulluese.
Në bord ndodheshin dy shtetas ukrainas, Vladyslav Cherniavskyi, 37 vjeç, dhe Oleksandr Yavtushenko, 43 vjeç, të cilët u arrestuan nën akuzën për ndihmë në imigracion të paligjshëm. Ata do të paraqiten sot në Gjykatën e Magjistraturës në Portsmouth.
Po ashtu, në jaht ndodheshin edhe pesë pasagjerë: katër shtetas shqiptarë dhe një grua nga Vietnami. Njëri prej shqiptarëve, Pellumb Selimi, 29 vjeç, ishte i shpallur në kërkim për mungesë paraqitjeje në gjykatë në lidhje me një çështje droge. Ai u arrestua menjëherë dhe do të dalë përpara Gjykatës së Lartë në St Albans.
Julian Harriman, zyrtar hetues i lartë në NCA, deklaroi: “Ky operacion është pjesë e një hetimi të gjerë dhe të vazhdueshëm, në bashkëpunim të ngushtë me autoritetet franceze dhe Gendarmerinë Kombëtare. Forca Kufitare britanike ka luajtur një rol kyç. Lufta kundër rrjeteve kriminale të trafikimit të njerëzve mbetet prioritet absolut për të dy vendet tona.”
Të arrestuarit ndodhen aktualisht në paraburgim, ndërsa hetimet për zbardhjen e plotë të rrjetit kriminal janë ende në vijim.
