Një zjarr ka rënë mesditën e sotme në një godinë pranë Lagunës së Nartës, në zonën e Zvërnecit në Vlorë, duke rrezikuar përhapjen e flakëve në pyllin me pisha që ndodhet aty pranë.
Ngjarja është regjistruar në zonën ku kanali i Lagunës së Nartës lidhet me detin. Godina e përfshirë nga flakët shërbente për magazinimin e materialeve të peshkimit.
Menjëherë pas njoftimit, në vendngjarje kanë mbërritur shërbimet zjarrfikëse të Vlorës, të cilat kanë ndërhyrë për të vënë nën kontroll zjarrin dhe për të parandaluar përhapjen e tij në sipërfaqen pyjore.
Nga zjarri nuk raportohet për persona të lënduar, ndërsa sipas të dhënave paraprake të shërbimit zjarrfikës, dyshohet se shkak i zjarrit ka qenë një shkëndijë elektrike.
Autoritetet pritet të sqarojnë rrethanat e plota të ngjarjes dhe të përcaktojnë shkakun përfundimtar të zjarrit.
