Nga Desada Metaj
Ajo që po ndodh me Gjykatën Kushtetuese dhe, më saktë, me anëtarët e saj është një temë shqetësuese për të cilën pakkush flet apo debaton në Shqipëri.
VNA raportoi gati dy javë më parë për një precedent të rrezikshëm në zëvendësimin e anëtarëve të Gjykatës Kushtetuese. Një iniciativë e pakonsultuar me Zyrën Juridike të Kuvendit nga kryetarja Elisa Spiropali, e cila, në shpalljen e vakancës për anëtaren e dorëhequr Elsa Toska, ndryshoi kohëzgjatjen e mandatit nga 2025 në 2028. Një precedent antikushtetues që bie ndesh me rekomandimet e Komisionit të Venecias, por që Spiropali duket se ka vendosur ta anashkalojë, duke krijuar modelin e ngjashëm për zgjatjen e mandatit edhe të dy anëtareve të tjera të Gjykatës Kushtetuese, Olta Zaçes dhe Sonila Bejtes.
Ndërsa lëvizja e kryetares së Kuvendit u pasuar me heshtjen e mazhorancës, edhe opozita e ka qepur gojën këtë herë. Përveç deputetes Jorida Tabaku, e cila reagoi me një status në Facebook, askush nga PD apo parti të tjera opozitare nuk ka thënë asgjë për lëvizjet e Spiropalit. Më i pavend në korin e heshtjes duket “memecllëku” i Sali Berishës. Kryetari i PD, që nuk lë rast pa akuzuar institucionet e drejtësisë, prej disa javësh ka kyçur gojën për zëvendësimin e pritshëm të anëtarëve të Gjykatës Kushtetuese. Madje ai nuk ka artikuluar asnjë fjalë as për anëtarët e saj që janë relatorë të çështjes së tij dhe të dhëndrit për masën e SPAK-ur për arrest shtëpie.
Fakt mbetet që Sali Berisha nuk lë t’i shpëtojë rasti për të akuzuar çdo institucion, prokuror apo gjykatës që ka pasur në dorë dosjet e tij dhe të familjarëve të tij. Por këtë herë, ndryshe nga sa ndodh me prokurorët e SPAK apo gjyqtarët e GJKKO, Berisha nuk ka përmendur as emrin e Gent Ibrahimit dhe as Marjana Seminit, gjyqtarëve relatorë që do të japin vendimin për kryetarin e PD dhe dhëndrin e tij.
Mjafton të kthehesh vetëm dy vite pas në kohë dhe të lexosh deklaratat e Berishës kur Gent Ibrahimi dhe të tjerë u zgjodhën si anëtarë të Gjykatës Kushtetuese dhe pyetja lind natyrshëm: Sali Berisha ka ndryshuar qëndrim për Gent Ibrahimin dhe anëtarët e tjetë të Gjykatës Kushtetuese apo ai thjesht ka shpallur një “amnisti” të pjesshme për ta? Një “falje nga telendisja” që e shtrirë në kohë mund të shërbejë dhe si gur themeli për një marrëveshje të re në prapaskenë, të ngjashme me atë që PS dhe PD gatuan për amnistinë penale apo kodin zgjedhor. Dhe që këtë herë mund të ketë një rreze më të largët, por fuqi më të fortë, duke përfshirë Gjykatën Kushtetuese dhe vendimet e saj të nxehta e të pritshme të javëve në vijim.
Vendimet e pritshme të Gjykatës Kushtetuese, si ajo për familjen Berisha apo për përgjimet e Sky ECC do të rezonojnë edhe në zhvillimet politime në këtë pragfushate elektorale. Gjithçka bëhet edhe më “politike” po ti shtosh këtij ekuacioni dhe lajmin nga burime të VNA se telefonatat për anëtarë të veçantë të Gjykatës Kushtetuese nga burgjet e sigurisë së lartë kanë qenë prezente gjatë javëve të fundit.
Të gjitha këto lëvizje të dukshme të shoqëruara me heshtjen e palëve dhe lëvizjet e padukshme rrisin automatikisht rrezikun që presionet politike dhe kriminale të kenë ndikim në vendimet e ditëve të ardhshme të Gjykatës Kushtetuese. Duke e lënë institucionin më të lartë kushtetues në vend në mëshirën e sharlatanizmit, presionit politik dhe kriminal. Pasuar me heshtjen faktorëve politikë dhe atyre opozitarë.
