Jurgis Çyrbja është socialisti i radhës që la mandatin e deputetit. Ai do të vijojë përballjen me drejtësinë pa mbështetjen e forcës së tij politike, ku mori radhazi dy mandate deputeti në një ndër qarqet më të rëndësishme në vend, atë të Durrësit. Ndaj tij, është ngritur akuza e shpërdorimit të detyrës për kohën kur drejtonte zyrën e Regjistrimit të Pasurive të Paluajtshme në qytetin bregdetar. Me gjasë, ai u detyrua të largohej nga Kuvendi pasi dorëzoi kërkesën për lënien e mandatit vetëm dy ditë pasi u pyet nga SPAK për këtë çështje. Edhe pse konsiderohet një hambar votash në qarkun e Durrësit, dhe konkretisht në zonën e tij, duket se mazhoranca socialiste ka vendosur të aktivizojë eksponentë të tjerë për të siguruar votat që i duhen për Durrësin.
Nw 2018 Cyrbja u ekspozua në përgjime me grupin e Emiljano Shullazit, por asokohe, PS i doli në krah dhe e mbajti në radhët e saj. Por këtë herë, për arsye që mbeten për t’u zbardhur, Edi Rama e la në baltë ish-të besuarin e tij. Kjo nuk është hera e parë që kryeministri ka bërë të njëjtën gjë me disa nga ish-bashkëpunëtorët e tij, të cilët, ndonëse i sillnin shumë vota, në një moment të caktuar zëvendësoheshin nga të tjerë “të besuar”.
Rrahman Rraja është një tjetër eksponent socialist që u largua duke lënë mandatin. Për vite me radhë, kryeministri e mbrojti Rrahman Rrajën. Edhe kur i biri akuzohej për dhunën barbare ndaj të dashurës Xhisiela Maloku dhe policia kërcënohej të mbyllte çështjen. Edhe kur nipat e tij, Redian dhe Ramazan Rraja – i pari u arrestua për atentatin te mbikalimi i Shkozetit dhe i dyti akuzohej atë kohë për trafik droge – tashmë akuzat ndaj tij janë shtuar. U desh një ngjarje që kishte në qendër dy kushërinj të pambrojtur, Jashar dhe Bilbil Maja, të cilët u dhunuan barbarisht nga djali dhe dy vëllezërit e kushërinjtë e Rrahman Rrajës, që ky i fundit të detyrohej nga forca e vet politike të largohej.
Lefter Koka, të cilin Edi Rama ia “rrëmbeu” Ilir Metës, është gjithashtu një personazh që u shfrytëzua deri në pikën e fundit dhe më pas iu dorëzua drejtësisë, për t’i vënë mbi supe barrën e rëndë të aferës së tre inceneratorëve, një nga aferat më të rënda të dekadës së fundit. Alqi Bllako po ashtu u largua shpejt, mbase edhe për shkak se pesha e tij në politikë nuk ishte përcaktuese.
Arben Ahmetaj, ish-zëvendëskryeministër, u përplas ashpër me kryeministrin, për motive që kurrë nuk do të mësohen plotësisht. Por Ahmetaj, ndryshe nga kolegët, nuk qëndroi kokulur. Ai u arratis dhe prej Zvicre flet dhe thotë ndonjë gjysmë të vërtetë. Ilir Beqaj është ndoshta i vetmi që kryeministri e mbrojti me forcë deri në momentin e fundit, por pa arritur sukses.
Të tjerët, ai vendosi t’i bëjë kurban. I fundit në radhë, Jurgis Cyrbja duket se do të zëvendësohet nga një tjetër personazh i njohur i zonës së Shijakut. Ish-aleati i Berishës dhe Bashës, Agron Duka, me gjasë do t’i bashkohet kryeministrit, i cili me këtë rast ka larguar një deputet me të shkuar të errët për ta zëvendësuar me një “vezë” të artë të asaj zone.
Tashmë, zgjedhjet parlamentare të 2025-ës janë në prag, dhe lufta brenda mazhorancës po bwhet cdo ditw e mw e ashpër, pwr shkak se klanet po pwrplasen fort ndërsa “kurbanët” e Edi Ramës nuk do të jenë vetëm personazhe të librit që kryeministri e shkroi kur ishte në opozitë.
