Edi Rama u justifikua sot për transportin e mbetjeve të dyshuara toksike, duke deklaruar fillimisht se kjo çështje është nën hetim dhe se përgjegjësitë do të dalin pas përfundimit të tyre.
Sipas tij, “në çdo deklaratë dhe dokument të paraqitur nga subjekte private, është shumë e qartë se eksporti i mallrave në fjalë nuk është eksport mbetjesh të rrezikshme. Dogana ka të bashkangjitur certifikatën e analizës së mallit nga një laborator i një vendi të BE-së.”
Megjithatë, kryeministri nuk iu përgjigj pyetjeve të mëposhtme:
1- A ka shteti shqiptar inventar për mbetjet e parrezikshme dhe të rrezikshme?
2- Ku depozitohen dhe si transportohen mbetjet e rrezikshme dhe të parrezikshme në Shqipëri?
3- Çfarë përgjegjësie mbajnë institucionet shqiptare për kontrollin e mbetjeve? Kur ka qenë hera e fundit që Ministria e Mjedisit ka kontrolluar vend-depozitimet dhe transportin e të gjitha llojeve të mbetjeve që prodhohen në Shqipëri?
4- Cili institucion shqiptar ka kontrolluar kompaninë Sokolaj shpk për mënyrën si e kryen transportin e mbetjeve? Kur ka qenë hera e parë dhe e fundit që është kryer një kontroll i tillë, qoftë nga institucionet e Ministrisë së Mjedisit, Doganave apo Tatimeve?
5- Analizat, siç thotë kryeministri, nuk kryhen në asnjë port detar të botës. Por kur është hera e fundit që një laborator në Shqipëri ka kryer analiza të tilla?
6- A kontrollon shteti shqiptar kompanitë prodhuese të mbetjeve? Çfarë masash ka marrë për të patur, qoftë edhe një inventar, për prodhimin e mbetjeve të parrezikshme dhe të rrezikshme?
7- Cili është laboratori i një vendi të BE që ka kryer analizat? Pse nuk përmend kryeministri emrin e laboratorit në Kroaci që ka lëshuar certifikatën për mbetjet e KURUM të eksportuara nga Sokolaj shpk?
8- Ku do të shkojnë dy anijet e Maersk me mbetje (të çdo lloji qofshin) që pritet të ankorohen në fund të muajit shtator në portin e Durrësit?
Pjesa tjetër e debatit në interpelancë është konsum politik, pa asnjë interes për shqiptarët!
