Zbythet Veliaj. Kryebashkiaku i Tiranës, i cili ndodhet në qeli, ka tërhequr delegimin e Sara Goxhajt në krye të Bashkisë me argumentin se ishte i keqinformuar.
Ndërsa përpiqet të shfajësohet se mes tij dhe kryeministrit ska asnjë përplasje, kur në fakt e vërteta është krejt ndryshe.
Veliaj thotë në reagim se për Ramën ka mall, ndërsa funksionit e tij si kryetar Bashkie do të ushtrojë Anuela Ristani që siç duket gëzon dhe mbështetjen e kryeministrit.
Reagimi i plotë i Veliajt:
U informova që paska plasur peshku në moçalet mediatike për përplasjen time me Ramën, për punë delegimesh.
E para njëherë, me Ramën kam vetëm mall të takohem për të folur për punët si gjithmonë dhe asgjë tjetër s’më shkon në mendje.
E dyta, kam firmosur një ridelegim me idenë e gabuar se ishte dakordësuar brenda ekipit drejtues, por kështu është kur “punon” pa informacionin e mjaftueshëm.
E fundit, kërkoni e gërmoni ku të doni tani, se u bë sport ky falë edhe prokurorit tim të dashur, por në marrëdhënien time me Ramën lodheni kot fare fare, se është plazmuar në kohëra të vjetra dhe nuk e ndryshon dot asnjë kohë, sado e mallkuar qoftë. Delegimi është rikthyer aty ku ishte dhe këtu mbyllet edhe keqkuptimi.
