Gjykata e Posaçme zgjati me 3 muaj afatet e hetimit për vëllezërit Fation, Aleksandër dhe Bushgjokaj, si dhe për Petrit Hoxhaj alias Çakri, të cilët akuzohen për rrëmbimin dhe zhdukjen e Renis Dobrës.
Gjatë seancës gjyqësore, SPAK deklaroi se nevojitet kohë deri në muajin tetor, me qëllim administrimin e akteve të ekspertimit, si dhe kryerjen e disa veprimeve hetimore shtesë që, sipas organit të akuzës, mendohet se do t’i shërbejnë zbardhjes së çështjes.
Avokati Erjon Kullolli, i cili mbron Fation Bushgjokajn, kundërshtoi kërkesën e SPAK, duke argumentuar se prokuroria ka pasur kohën e nevojshme për të përfunduar të gjitha veprimet hetimore, por ende nuk i ka kryer ato.
Vëllezërit Bushgjokaj dhe Petrit Hoxha akuzohen se kanë rrëmbyer, vrarë dhe më pas kanë tentuar ta hedhin në liqenin e Shkopetit trupin e pajetë të Dobrës, me qëllim fshehjen e gjurmëve. Dyshohet se motivi i krimit lidhet me përplasjet mes tyre për trafikun e drogës.
Vëllezërit Bushgjokaj, ndërkohë, dhunuan pak javë më parë të pandehurin Petrit Çakri, teksa ai mbahej në kafazin e xhamit në GJKKO, me pretendimin se kishte shpifur ndaj tyre, duke i implikuar në vrasjen e Dobrës.
