Gjykata e Posaçme pranon kërkesën për pyetjen si dëshmitar të Halit Valterit, në procesin ndaj Amar Shkëmbit dhe Bledar Polovinës. Të dy akuzohen për atentatin te mbikalimi i Shkozetit, ku u vra Andi Maloku dhe u plagosën prokurori i Durrësit në atë kohë, Arjan Ndoj, dhe Aleksandër Laho, i njohur si Rrumi.
Polovina, sipas SPAK, ka qenë në rolin e ekzekutorit në ngjarje, bashkë me Redian Rrajën, i cili është dënuar me burgim të përjetshëm në një proces të ndarë. Për këtë ngjarje është dënuar me burgim të përjetshëm edhe kreu i grupit, Plarent Dervishaj, i cili ishte në konflikt me Rrumin.
