Një ngjarje e rëndë është shënuar këtë të diel në fshatin Orizaj, në Bashkinë e Beratit, ku një 15-vjeçar ka humbur jetën pasi u mbyt në lumë.
Sipas informacioneve paraprake, adoleshenti kishte dalë në arë së bashku me të atin për të punuar. Në një moment, ai ka hyrë në lumë për t’u freskuar, por është marrë nga rrjedha e ujit.
I ati ka hyrë menjëherë në lumë në përpjekje për ta shpëtuar dhe ka arritur ta nxjerrë në breg, por fatkeqësisht 15-vjeçari ishte pa shenja jete.
Në vendngjarje kanë mbërritur shërbimet e Policisë dhe autoambulanca, e cila e ka transportuar trupin e pajetë drejt morgut të Spitalit Rajonal të Beratit, ku do t’i nënshtrohet autopsisë mjeko-ligjore.
Grupi hetimor vijon punën për zbardhjen dhe dokumentimin e plotë të rrethanave të ngjarjes. Dyshimet paraprake janë se i mituri është mbytur aksidentalisht gjatë kohës që po lahej në lumë.
