SPAK ka shpallur pretencën për të pandehurit Fatime Kryemadhi, Piro Xhixha dhe Ema Çoku, të akuzuar si bashkëpunëtorë të ish-presidentit Ilir Meta dhe ish-bashkëshortes së tij, Monika Kryemadhi. Ndërkohë, Meta dhe Kryemadhi po gjykohen në një proces të ndarë me gjykim të zakonshëm.
Për Piro Xhixhën, Prokuroria e Posaçme kërkoi deklarimin fajtor për veprën penale të korrupsionit dhe dënimin me 4 vjet e 6 muaj burg. Për shkak të gjykimit të shkurtuar, dënimi ulet në 3 vite burg. SPAK kërkoi që ekzekutimi i dënimit të pezullohet dhe ai të vihet në shërbim prove për një periudhë 4-vjeçare.
Për Fatime Kryemadhin, SPAK kërkoi dënimin me 7 vjet e 6 muaj burg. Me përfitimin nga gjykimi i shkurtuar, dënimi zbret në 5 vite burg. Edhe për të, Prokuroria kërkoi pezullimin e ekzekutimit të dënimit dhe vendosjen në shërbim prove për 5 vjet.
Ndërsa për Ema Çokun, SPAK kërkoi deklarimin fajtore për veprën penale të pastrimit të parave dhe dënimin me 7 vite burg. Për shkak të gjykimit të shkurtuar, dënimi ulet në 4 vite e 8 muaj burg. Prokuroria kërkoi gjithashtu pezullimin e ekzekutimit të dënimit dhe vendosjen e saj në shërbim prove për një periudhë 5-vjeçare.
Pretenca e SPAK do t’i kalojë tashmë për vlerësim Gjykatës së Posaçme, e cila do të marrë vendimin përfundimtar.
