GJKKO kthen sërish në SPAK dosjen ndaj Elvis Roshit, kërkon saktësimin e akuzës

GJKKO ka kthyer sërish për hetime të mëtejshme në SPAK dosjen penale ndaj ish-kryebashkiakut të Kavajës, Elvis Roshi, i akuzuar për shpërdorim detyre.

Vendimi është marrë nga gjyqtarja Rudina Palloj, e cila, pas shqyrtimit të pretendimeve të palëve në seancë, i kërkoi SPAK-ut të saktësojë akuzën e ngritur ndaj ish-zyrtarit. Edhe më herët, gjykata i kishte lënë detyrë prokurorisë të korrigjonte mënyrën e formulimit të akuzës.

Gjatë seancës gjyqësore, avokati mbrojtës i Roshit, Andi Skënderi, argumentoi se konkluzionet e prokurorisë, kohëzgjatja e hetimeve dhe ngritja e akuzës nuk janë në përputhje me afatet procedurale të parashikuara nga legjislacioni në fuqi.

Gjykata nuk bëri publike arsyetimin mbi detyrat e lëna për SPAK-un, ndërsa motivacioni i plotë i vendimit pritet t'u komunikohet palëve pas zbardhjes së tij.

Sipas akuzës, Elvis Roshi dyshohet se ka kryer veprën penale të shpërdorimit të detyrës në lidhje me dy procedura prokurimi të zhvilluara gjatë vitit 2014, njëra prej të cilave kishte si objekt shërbimin e pastrimit të qytetit të Kavajës. Hetimet janë mbështetur edhe në një audit të Kontrollit të Lartë të Shtetit (KLSH), i cili ka konstatuar një dëm ekonomik të vlerësuar në rreth 33 milionë lekë.