Drejtoresha e filialit të Postës Shqiptare në Durrës, Elisabeta Mataj, është larguar nga detyra pas dyshimeve për parregullsi në administrimin e fondeve të institucionit.
Sipas burimeve, dyshohet se në fondet e filialit mungon një shumë prej rreth 700 mijë eurosh, e cila dyshohet se është përvetësuar. Megjithatë, kjo shumë dhe përgjegjësia konkrete për ngjarjen nuk janë konfirmuar zyrtarisht nga autoritetet.
Mataj ishte emëruar në krye të filialit të Postës së Durrësit në tetor të vitit 2025, pas largimit të drejtueses së mëparshme Etleva Budini, e cila fitoi mandatin e deputetes në zgjedhjet parlamentare të 11 majit, ku garoi në listat e hapura.
Ndërkohë, mësohet se ka dhënë dorëheqjen edhe drejtuesja e sektorit të financës në këtë filial, Valbona Hoti Duni.
Posta Shqiptare bëri të ditur më herët se, gjatë një kontrolli të brendshëm në filialin e Durrësit, janë konstatuar parregullsi në administrimin e fondeve që lidhen me shërbimet e pagesave. Institucioni deklaroi se ka marrë masa administrative ndaj punonjësve përgjegjës dhe ka referuar çështjen në Prokurori për hetim të mëtejshëm.
