Vota e Diasporës, PD kërkon monitorim ndërkombëtar
Ndryshe nga PS që bën thirrje për votim emigrantëve në Greqi, PD ka denoncuar publikisht sot se DHL me nënkontraktorët e saj po kontrollon procesin me njerëzit e pushtetit. Jozefina Topalli, drejtuese politike për Diasporën dhe Florian Nuri, në një konferencë për mediat deklaruan se njerëz të paidentifikuar paraqiten në të ashtuquajtura zyra postare, por sipas saj janë lokale të lojërave të fatit dhe marrin zarfet me fletët e votimit. "Njerëz të paidentifikuar marrin jo një, por 10 deri në 100 zarfe votimi dhe i kthejnë në këto lokale pa vendosur firmën e tyre dhe pa dorëzuar shenjën e identifikimit. Ky fenomen është shpërndarë në të gjitha lokalet e lojërave të fatit, kjo e ka emrin manipulim të procesit zgjedhor në Greqi"- tha Topalli duke bërë thirrje ODIHR dhe OSBE të kenë një fokus të veçantë me procesin që po ndodh në Greqi. "Një monitorim ndërkombëtar i vëzhguesve të huaj mbi procesin që ka kaluar jashtë kontrollit dhe ne kemi gjykimin se po kryhet nga partia në pushtet, në kërkojmë mbështetjen dhe monitorimin e tyre. Së dyti i kërkojmë KQZ që të bëjë auditimin e të gjitha kutive të votimit, mënyrën e transportit së bashki me fletët e votimit dhe të transportit nga Greqia në Tiranë. Së treti i bëjmë thirrje SPAK që të bëjë një hetim dhe i bëjmë pyetje se kush janë ata që po thyejnë ligjin”, tha Topalli. Në Greqi, vota e shqiptarëve është shumë e rëndësishme nisur edhe numri i lartë të emigrantëve, por që po has në vështirësi të mëdha. Sipas afateve ligjore fletët e votimit me vullnetin e shprehur duhet të vijnë deri të premten në darkë, ndryshe nuk do arrijnë të lexohen.
