Katër ditë para zgjedhjeve të 11 majit, Ambasada e Shteteve të Bashkuara në Tiranë ka përcjellë një mesazh inkurajues për qytetarët shqiptarë. Përmes një postimi në rrjetet sociale, ambasada u bën thirrje zgjedhësve të votojnë pa frikë dhe të mos lejojnë të tjerët të vendosin në vend të tyre. “Vota jote është vetëm e jotja”, thuhet në mesazhin e shpërndarë nga përfaqësia diplomatike. SHBA nxit pjesëmarrjen aktive në zgjedhje dhe thekson rëndësinë e një procesi të lirë dhe demokratik. Mesazhi vjen në një kohë kur vendi po përgatitet për të hyrë në fazën përfundimtare të fushatës zgjedhore.
