Policia e Shtetit ka arrestuar në Aeroportin Ndërkombëtar të Tiranës shtetasin ukrainas Anatolii Streletskyi, i cili kërkohej nga autoritetet në Kiev nën dyshimin për trafikim të lëndëve narkotike si pjesë e një organizate kriminale.
Lajmin e bëri të ditur Ambasada Amerikane në Tiranë, përmes një postimi ku thekson se arrestimi u mundësua pas shkëmbimit të informacionit me Njësinë e Hetimeve Penale Ndërkombëtare të Shërbimit të Sigurisë Diplomatike pranë saj.
Sipas ambasadës, bashkëpunimi në kohë reale përtej kufijve ndihmoi në ndalimin e të dyshuarit. Interpol Tirana po bashkëpunon me homologët ukrainas për të nisur procedurat e ekstradimit.
Ambasada e cilësoi këtë operacion si një shembull konkret të partneritetit me autoritetet shqiptare në luftën kundër krimit transnacional dhe garantimin e sigurisë së komuniteteve.
