Nën hetim /Zegjineja e Ramës dyshohet se kërcënoi qytetarët për votë
Pa nisur akoma rrugëtimin e saj politik, Zegjine Çaushi, dyshohet se ka kërcënuar qytetarët për t'a votuar. Prokuroria e Posaçme i ka kërkuar Prokurorisë së Fierit të kryejë hetime ndaj kandidates së PS-së në qarkun e Fierit Zegjine Çaushi, pas publikimit të një audiopërgjimi ku i bën presion dhe kërcënon një qytetare për votën.
SPAK i kaloi çështjen për kompetencë Prokurorisë së Fierit për shkak se nga hetimet ka rezultuar se kandidatja për deputete e PS-së nuk ka kryer veprën penale “korrupsion aktiv në zgjedhje”.
Ajo dyshohet për “Shpërdorimi i detyrës”, “Përdorimit të funksionit publik për veprimtari politike ose zgjedhore” dhe “Kanosje apo dhunim ndaj pjesëmarrësve në zgjedhje”, vepra të cilat nuk janë kompetencë e SPAK.
Për këtë arsye, SPAK ka vendosur që të mos regjistrojë procedim penal për “korrupsion aktiv në zgjedhje”, dhe ti kalojë dosjen Prokurorisë së Fierit që të kryejë veprime hetimore procedurale për këto 3 vepra penale të tjera”, informoi organi i akuzës.
