Detaje të reja kanë dalë në dritë nga hetimet për vdekjen e këngëtarit grek Giorgos Mazonakis, i cili humbi jetën brenda një klinike private. Dëshmitë e personelit mjekësor zbulojnë momentet kritike para vdekjes së tij dhe veprimet e ndërmarra për ta mbajtur në jetë.
Sipas dëshmive të infermiereve para hetuesit, Mazonakis u gjet i zbehtë, pa ndjenja dhe pa reagim, ndërsa gjendja e tij po përkeqësohej me shpejtësi. Stafi i vendosi oksigjen dhe serum fiziologjik, ndërsa mjeku kërkoi që t’i ngriheshin këmbët.
Një infermiere deklaroi se mjeku ishte jashtëzakonisht i shqetësuar dhe se nuk e kishte parë më parë në atë gjendje. Sipas saj, aparatura me të cilën po trajtohej këngëtari nuk kishte dhënë sinjal alarmi.
Një tjetër infermiere dëshmoi se, pasi tensioni i Mazonakis ra dhe u shfaqën probleme me ritmin e zemrës, mjeku nisi reanimimin kardiopulmonar (CPR). Sipas saj, nga momenti kur personeli hyri në dhomë deri në nisjen e reanimimit kaluan rreth 5 deri në 10 minuta. Ndërkohë, në dhomë u soll edhe një defibrilator.
Një nga elementet kryesore të hetimit lidhet me propofolin, një medikament anestezik dhe hipnotik që përdoret zakonisht në ambiente të kontrolluara mjekësore.
Një anesteziologe ka dëshmuar se më 9 shtator 2026 mori një telefonatë nga një infermiere e klinikës, e cila e pyeti nëse ekzistonte antidot për propofolin. Anesteziologia iu përgjigj se propofoli nuk ka antidot specifik.
Ajo deklaroi gjithashtu se nuk ishte në dijeni që propofoli përdorej në këtë klinikë dhe se më parë askush nga personeli nuk e kishte kontaktuar për çështje që lidheshin me substanca anestezike.
Dëshmitë kanë ngritur pikëpyetje edhe për aparaturën e përdorur gjatë trajtimit. Një infermiere e përshkroi procedurën si veçanërisht invazive dhe tha se në raste të tjera pacientët kishin shfaqur marramendje ose të vjella pas trajtimit.
Detaje të tjera janë dhënë nga një pjesëtare e ekipit të urgjencës që mbërriti në klinikë. Ajo deklaroi se kishte kërkuar informacion për historikun mjekësor të Mazonakis dhe medikamentet që mund t’i ishin administruar, por mjeku i pranishëm i kishte thënë se nuk i dinte këto të dhëna dhe se do t’ua jepte mjekja e pacientit.
Sipas dëshmisë së saj, askush nga klinika nuk kërkoi të shoqëronte Mazonakis drejt spitalit.
