Rreth 400 shkolla dhe institucione të tjera arsimore në Francë pritet të qëndrojnë të mbyllura të premten, pasi protestat e nxënësve për kushtet në arsim janë përshkallëzuar në dhunë në disa zona të vendit.
Protestat nisën muajin e kaluar në rajonin e Parisit, me nxënësit që kundërshtonin mungesën e mësuesve dhe gjendjen e amortizuar të godinave shkollore. Lëvizja u përhap më pas në të gjithë Francën, ndërsa në disa qytete janë regjistruar përplasje me policinë, persona të plagosur dhe qindra arrestime.
Ministri francez i Drejtësisë, Gerald Darmanin, deklaroi për radion RTL se në protesta është përfshirë një “pakicë aktive dhe e dhunshme”, duke ngritur pikëpyetje nëse të gjithë personat e përfshirë janë nxënës të shkollave të mesme.
Sipas Darmanin, rreth 2 mijë persona janë arrestuar që prej nisjes së protestave, ndërsa afro dy të tretat e tyre janë mbajtur në paraburgim policor.
Ministri tha se situata ka kaluar nga demonstratat e nxënësve në një problem të rendit publik, duke iu referuar sulmeve ndaj autobusëve dhe zjarrvënieve në shkolla.
Ministri i Arsimit, Edouard Geffray, bëri të ditur se pak më shumë se 400 shkolla dhe institucione të tjera arsimore do të qëndrojnë të mbyllura të premten.
Ndërkohë, sipas një burimi pranë kryeministrit Sébastien Lecornu, shërbimet e inteligjencës kanë deklaruar gjatë një takimi të posaçëm për krizën se lëvizja e protestave ishte nxitur nga politikanë të së majtës radikale, përfshirë anëtarë të partisë La France Insoumise (LFI). Deputeti i LFI-së, Louis Boyard, i ka mohuar këto pretendime.
Tensionet u përshkallëzuan të enjten, kur protestues studentë u vunë zjarrin të paktën dy shkollave të mesme. Në Marsejë, mësues u spërkatën aksidentalisht me benzinë gjatë një incidenti në një tjetër shkollë.
Në Strasburg u dogj të paktën një automjet, ndërsa në Toulouse të rinjtë u përplasën me forcat e policisë.
Protestat janë shtrirë edhe përtej Francës. Nxënës të shkollave të mesme në qytetin Liège të Belgjikës nisën gjithashtu protesta të enjten, ndërsa mediat lokale raportuan se autoritetet kishin vendosur mbylljen e shkollave të qytetit të premten.
