Christa Pike, e dënuara me vdekje që i mbijetoi përpjekjes së shtetit të Tennessee-t për ta ekzekutuar me injeksion vdekjeprurës, ndodhet e intubuar, në ventilator dhe pa ndjenja në një spital pranë Nashville.
Sipas avokatëve të saj, Pike po merr trajtim për shpëtimin e jetës pasi iu injektuan dy doza pentobarbitali, një substancë që në protokollin e ekzekutimit konsiderohet fatale. Gjendja e saj mjekësore dhe e ardhmja ligjore mbeten të paqarta.
Pike ishte dënuar me vdekje për vrasjen e 19-vjeçares Colleen Slemmer në vitin 1995. Ajo pritej të bëhej gruaja e parë e ekzekutuar në Tennessee pas 200 vitesh, por ekzekutimi i së mërkurës dështoi.
Guvernatori republikan i Tennessee-t, Bill Lee, ka njoftuar se do të ndalojë ekzekutimin e fundit të planifikuar për këtë vit, ndërsa një hetim i pavarur do të përcaktojë “çfarë ndodhi saktësisht” në rastin Pike.
“Guvernatori ka vepruar drejt duke kërkuar një hetim. Duhet të dimë çfarë ndodhi”, deklaroi zyra e Prokurorit të Përgjithshëm të Tennessee-t, Jonathan Skrmetti.
Sipas dëshmitarëve mediatikë të pranishëm në ekzekutim, Pike dha fjalët e fundit në orën 19:26. Pas dy dozave të lëndës vdekjeprurëse, ajo nisi të gërhiste dhe dukej se ishte ende gjallë.
“Asgjë nga kjo nuk ishte normale”, tha gazetarja Catherine Sweeney e WPLN, e cila ka mbuluar disa ekzekutime në Tennessee. “Nuk kemi parë asgjë të tillë. Shkoi shumë keq.”
Departamenti i Korrigjimit në Tennessee këmbëngul se ka ndjekur çdo hap të protokollit zyrtar të miratuar nga autoritetet. Sipas këtij institucioni, protokolli nuk lejonte ndërhyrje të tjera përtej atyre që u kryen atë mbrëmje.
Avokatët e Pike thonë se kishin paralajmëruar më parë gjykatën se problemet me venat e saj mund ta bënin injeksionin vdekjeprurës të vështirë ose të rrezikshëm. Ata pretendojnë se gjatë procedurës pati vështirësi në gjetjen e venave, dëmtim të tyre dhe mungesë të kujdesit urgjent mjekësor në momentin kur ekzekutimi dështoi.
Njëri prej avokatëve, Stephen Ferrell, tha se frika më e madhe e Pike nuk ishte vdekja, por një vdekje e zgjatur, e dhimbshme dhe traumatike.
“Kjo ndodhi, vetëm pa vdekjen”, tha ai.
Rasti ka hapur një dilemë të rëndë ligjore: çfarë ndodh me një të dënuar që i mbijeton ekzekutimit?
Eksperti i dënimit me vdekje, Austin Sarat, profesor në Amherst College, tha për CNN se ekzekutimet e dështuara nuk janë të panjohura në SHBA, por rastet kur një ekzekutim dështon plotësisht dhe i dënuari mbijeton janë jashtëzakonisht të rralla.
Ka precedentë historikë. Në vitin 1946, Willie Francis, 16 vjeç, i mbijetoi karriges elektrike në Louisiana për shkak të një defekti teknik, por më pas Gjykata e Lartë lejoi ekzekutimin e dytë. Në Ohio, Romell Broom i mbijetoi një tentative ekzekutimi në vitin 2009 pasi autoritetet nuk arritën t’i vendosnin linjën intravenoze; ai vdiq nga Covid-19 në vitin 2020, ende në radhën e vdekjes.
Por rasti i Christa Pike konsiderohet më i ndërlikuar, sepse substanca vdekjeprurëse në fakt hyri në trupin e saj.
“Jemi në një territor pothuajse të paprecedentë”, tha Sarat. “Ajo i mbijetoi ekzekutimit të saj.”
