Një ngjarje tragjike ka tronditur Houstonin në Teksas, ku një vajzë 4-vjeçare u gjet e vrarë me armë zjarri, ndërsa policia dyshon se autorja ishte nëna e saj 35-vjeçare, e cila më pas qëlloi edhe veten.
Viktima është identifikuar nga familja si Vivian Savella. Ngjarja ndodhi vetëm disa orë pas një seance gjyqësore lidhur me kujdestarinë e vajzës.
Sipas dokumenteve gjyqësore të cituara nga mediat amerikane, babait, Aaron Savella, i ishte dhënë e drejta kryesore për të përcaktuar vendbanimin e vajzës, ndërsa takimet e nënës me fëmijën do të zhvilloheshin nën mbikëqyrje.
Vivian pritej të shkonte te babai i saj atë mbrëmje, por kjo nuk ndodhi.
Policia mbërriti në banesë rreth orës 17:45 dhe gjeti 4-vjeçaren të pajetë. Nëna u gjet e plagosur rëndë nga një plagë që dyshohet se ia kishte shkaktuar vetes. Ajo u transportua në spital, ku ndërroi jetë një ditë më vonë.
Në momentin e të shtënave në banesë ndodheshin edhe persona të tjerë, të cilët dëgjuan krismat, sipas autoriteteve.
Familja e Vivian është shprehur e shkatërruar nga humbja, duke e përshkruar vogëlushen si një fëmijë të dashur jashtëzakonisht shumë nga babai dhe njerëzit që e njihnin.
Policia e Houstonit po e heton ngjarjen si një rast të dyshuar vrasje-vetëvrasje, ndërsa rrethanat e plota të tragjedisë dhe të konfliktit për kujdestarinë mbeten nën hetim.
