Policia arreston gjashtë persona, të cilët në konfliktin e sipër mund të kryenin vrasje. Në pranga përfunduan Orgito Lamka, Kevin Sota, Serxhio Duda, Shahin Xhepexhiu, Santiago Alla dhe Zeni Kule. Ndërsa u sekuestruan dy armë zjarri, njëra prej të cilave me silenciator.
“Policia mori njoftim se, në një lokal në pronësi të shtetasit Zeni Kule, 50 vjeç, po ndodhte një konflikt me sende të forta.
Shërbimet e Policisë janë afruar në vendngjarje, ku kanë konstatuar shtetasin Orgito Lamka, 22 vjeç, dhe shtetasin Shahin Xhepexhiu, 51 vjeç, të cilët ishin dëmtuar gjatë konfliktit me sende të forta.
Shtetasit Orgito Lamka dhe Shahin Xhepexhiu, pasi kanë marrë mjekim dhe kanë përfunduar deklarimet në Komisariat, janë larguar në banesat e tyre”, thuhet në njoftim.
Më vonë, Policia mori njoftim në rrugë operative se një prej autorëve, shtetasi Orgito Lamka, disa orë më vonë ishte rikthyer te lokali i armatosur me një armë zjarri pistoletë me silenciator dhe dyshohet se do të vriste shtetasin Shahin Xhepexhiu.
Në vijim të aksionit u arrestua Orgito Lamka, 22 vjeç, me precedent penal në fushën e prodhimit dhe shitjes së narkotikëve në Shqipëri dhe Belgjikë.
Këtij shtetasi iu gjet dhe sekuestrua një armë zjarri pistoletë me silenciator, me fishek në fole, gati për qitje.
Kevin Sota, 45 vjeç, me precedent penal në fushën e prodhimit dhe shitjes së narkotikëve në Shqipëri.
Këtij shtetasi, gjatë kontrollit të automjetit, shërbimet e Policisë i gjetën një armë zjarri pistoletë.
Serxhio Duda, 28 vjeç, me precedent penal në fushën e prodhimit dhe shitjes së narkotikëve në Shqipëri. Ky shtetas drejtonte automjetin me të cilin shtetasi Orgito Lamka ishte rikthyer te lokali pas disa orësh.
Santiago Alla, 30 vjeç, i cili ka tentuar të heqë armën e zjarrit nga automjeti i shtetasit Kevin Sota.
Zeni Kule, 50 vjeç, pronari i lokalit, i cili u arrestua për moskallëzim krimi.
Shahin Xhepexhiu, 51 vjeç, për moskallëzim krimi, pasi gjatë hetimit ka rezultuar se gjatë deklarimit nuk ka treguar të vërtetën në lidhje me konfliktin.
Në cilësinë e provës materiale u sekuestruan 2 armë zjarri pistoletë, njëra prej tyre me silenciator, 4 automjete dhe 6 aparate celulare. Armët e zjarrit do t’i nënshtrohen ekspertimit përkatës.
