Gjykata e Korçës ka caktuar masën e sigurisë “arrest me burg” për Kristjan Sterjon, 20 vjeç, i akuzuar për vrasjen e bashkëmoshatarit të tij, Joan Zukos.
Seanca gjyqësore u zhvillua nën masa të rrepta sigurie, për të shmangur çdo incident të mundshëm. Sterjo akuzohet për “Vrasje me paramendim” dhe “Mbajtja pa leje dhe prodhimi i armëve, armëve shpërthyese dhe municionit”.
Burime brenda gjykatës bëjnë me dije se Sterjo ka deklaruar të njëjtat gjëra që ka pohuar edhe para grupit hetimor. Sipas informacioneve, 20-vjeçari ka qenë i qetë gjatë gjithë seancës dhe, në përfundim të fjalës së tij, është shprehur se është penduar për atë që ka bërë.
Sterjo ka deklaruar se ai dhe Zuko kishin pasur konflikte edhe më herët, por ka mohuar se kishte pasur qëllim ta vriste. Sipas dëshmisë së tij, konflikti mes tyre kishte nisur pas disa përplasjeve të mëparshme dhe pretendimit se viktima kishte ngacmuar të dashurën e tij dhe e kishte sharë nga familja.
Pas një përplasjeje më 8 gusht, Sterjo është larguar në banesë, ka marrë një armë zjarri dhe është nisur drejt lagjes ku ndodhej Zuko. Ai e ka ndjekur viktimën deri në një pallat dhe e ka qëlluar me një plumb, duke i shkaktuar vdekjen.
Pas ngjarjes, 20-vjeçari është larguar nga vendi i krimit dhe ka fshehur armën në një zonë me shkurre. Pas rreth gjashtë orësh ndjekje, ai u arrestua nga policia dhe forcat RENEA. Sterjo rezulton të jetë arrestuar edhe më parë për plagosje me thikë. Me vendimin e Gjykatës së Korçës, Kristjan Sterjo do të qëndrojë në arrest me burg gjatë vijimit të hetimeve dhe procedimit gjyqësor ndaj tij.
