Burgjet dhe Policia kanë bërë ping-pong me njëra-tjetrën, për lejen e posaçme që duhet t’i jepej të dënuarit me burgim të përjetshëm që të mund të linte qelinë për disa orë për varrimin e nënës.
Mëngjesin e sotëm, Drejtoria e Përgjithshme e Burgjeve i ka drejtuar një email Policisë së Shtetit duke i kërkuar që të sigurojë perimetrin e jashtëm me qëllim shoqërimin e të dënuarit me burgim të përjetshëm.
Në email është kërkuar po ashtu informacion nëse ka të dhëna për ndonjë hakmarrje të mundshme ndaj Çapjas, për shkak të problemeve që ka me krerë të grupeve kriminale në qytet.
Policia zyrtarisht nuk ka kthyer një përgjigje, pasi pretendon se i takon Burgjeve të vendosin, por ka nxjerrë forcat në rrugë. Pra institucionet përmes pasimit të topit, pranojnë në këtë mënyrë se s’mund të garantojnë jetën e të dënuarit në një qytet si Elbasani që duket se vijon të jetë nën pushtetin e bandave.
Varrimi ishte caktuar në orën 14:00, por familjarët e Ardian Çapjas kanë njoftuar burgjet që mund ta shtyjnë orarin, nëse vendosin ta shoqërojnë atë. Por nuk kanë marrë përgjigje.
Çapja është dënuar me burgim të përjetshëm si urdhërues i vrasjes së Nezir e Gentian Beqirit, babë e bir, në shenjë hakmarrje, ndërsa njihet si kundërshtar i përbetuar i Suel Çelës, aktualisht në kërkim nga SPAK. Ardian Çapja iu ka mbijetuar disa atentateve mafioze.
