Presidenti amerikan Donald Trump është rikthyer te ideja e ndryshimit të regjimit në Iran, gjashtë muaj pasi nisi luftën kundër Teheranit, ndërsa diplomacia mes dy vendeve ka hyrë në një pikë bllokimi dhe trafiku në Ngushticën e Hormuzit vijon të jetë nën nivelet e para luftës.
Sipas CNN, Trump prej muajsh u ka bërë privatisht të njëjtën pyetje anëtarëve të ekipit të tij të sigurisë kombëtare: Pse populli iranian nuk po ngrihet kundër udhëheqjes së vendit.
Në fillim të konfliktit, presidenti amerikan dukej se besonte se protestat masive do të shpërthenin në Teheran. Këtë bindje, sipas personave të njohur me çështjen, e kishte forcuar edhe kryeministri izraelit Benjamin Netanyahu, i cili kishte argumentuar se një valë e fuqishme sulmesh do të nxiste rrëzimin e regjimit.
Megjithatë, zyrtarë të tjerë amerikanë ishin më skeptikë. Ata kishin parë vlerësime të inteligjencës që sugjeronin se një kryengritje e menjëhershme në Iran nuk kishte shumë gjasa të ndodhte. Çështja thuhet se ishte diskutuar ashpër në administratën amerikane përpara nisjes së sulmeve.
Kur nisi lufta në fund të shkurtit, Trump u bëri thirrje iranianëve që të merrnin kontrollin e vendit. “Ky ndoshta do të jetë shansi juaj i vetëm për breza të tërë”, u shpreh ai në një video të publikuar natën kur filloi konflikti.
Por kjo ide u zbeh me kalimin e muajve, pasi vëmendja e administratës amerikane u zhvendos te negociatat me Teheranin dhe rihapja e Ngushticës së Hormuzit. Në qershor, Trump deklaroi se nuk kishte qenë kurrë i interesuar për ndryshimin e regjimit në Iran dhe argumentoi se përpjekjet amerikane për rrëzimin e qeverive të huaja “nuk funksionojnë kurrë”.
Megjithatë, sipas CNN, Trump vazhdoi privatisht të pyeste pse thirrjet e tij për ndryshim politik nuk po gjenin përgjigje te populli iranian.
Tashmë, me bisedimet e bllokuara dhe presionin ekonomik e ushtarak ndaj Teheranit në rritje, presidenti amerikan duket se po rikthehet te ideja e një ndryshimi të brendshëm në Iran.
Të martën në mbrëmje, Trump shkroi në rrjetin e tij social se nuk po përpiqej ta detyronte Iranin të ulej në tryezën e negociatave, duke pretenduar se pozita e SHBA-së ishte më e favorshme për shkak të kontrollit mbi Ngushticën e Hormuzit dhe krizës ekonomike iraniane.
Më pas ai shtroi publikisht pyetjen që prej muajsh e kishte diskutuar privatisht: “Kur do të ngrihet populli iranian dhe do të luftojë?”
Një ditë më vonë, Trump tha se e kishte bërë pyetjen duke e ditur se iranianët po përballeshin me represion të ashpër. “Ata po qëllohen”, deklaroi presidenti amerikan, duke shtuar se kjo ishte arsyeja pse protestat nuk po shpërthenin në shkallë të gjerë.
Ndërkohë, presioni ndaj Iranit po thellohet. Sanksionet dhe bllokada amerikane kanë goditur rëndë ekonominë e vendit, ndërsa rial-i ka rënë në nivele rekord dhe eksportet e naftës janë reduktuar ndjeshëm. Sipas Reuters, situata ekonomike po rrit rrezikun e rikthimit të protestave, por deri tani nuk ka shenja se regjimi iranian po përgatitet të dorëzojë pushtetin.
