“Aroma e moshës” ekziston, por nuk lidhet me papastërtinë: çfarë ndryshon në trup pas të 40-ave
Ideja se njerëzit fillojnë të kenë një aromë karakteristike me kalimin e moshës është përmendur prej kohësh, por shkenca tregon se pas saj ekziston një proces real biologjik dhe se ai nuk ka domosdoshmërisht lidhje me higjienën personale.
Sipas ekspertëve të cituar nga “The Guardian”, një nga faktorët kryesorë është një përbërës i quajtur 2-nonenal, i cili krijohet kur disa yndyrna në sipërfaqen e lëkurës oksidohen. Me kalimin e viteve, përbërja e yndyrave të lëkurës ndryshon dhe barriera natyrore e saj bëhet gjithashtu më e dobët.
Ndryshimi mund të nisë që rreth moshës 40-vjeçare dhe gradualisht të bëhet më i dallueshëm, megjithëse niveli ndryshon shumë nga një person te tjetri. Gjenetika, dieta, ambienti, mënyra e jetesës, shëndeti dhe higjiena ndikojnë të gjitha në aromën individuale të trupit.
Pikërisht për këtë arsye, ekspertët kundërshtojnë idenë se e ashtuquajtura “aromë e të moshuarve” vjen sepse dikush nuk lahet mjaftueshëm. Ajo është më tepër një ndryshim i natyrshëm kimik, i ngjashëm me thinjat apo ndryshimet e tjera që shoqërojnë plakjen.
Interesant është fakti se perceptimi shoqëror nuk përputhet domosdoshmërisht me realitetin. Studime të mëparshme kanë treguar se aroma e personave më të moshuar shpesh vlerësohet si më pak intensive dhe më pak e pakëndshme sesa ajo e të rinjve.
2-nonenal nuk mund të “hiqet” plotësisht, sepse lidhet me proceset natyrore të trupit. Megjithatë, larja e rregullt, ajrosja e rrobave dhe ambienteve, kujdesi për lëkurën dhe kontrolli i faktorëve që rrisin stresin oksidativ mund ta bëjnë aromën më pak të dallueshme.
Edhe dieta mund të ketë ndikim. Ushqimet e pasura me antioksidantë dhe një stil jetese që kufizon dëmtimin oksidativ të qelizave mund të ndihmojnë shëndetin e lëkurës, megjithëse ekspertët theksojnë se plakja dhe ndryshimet që sjell ajo nuk mund të ndalohen.
Pra, ajo që shpesh etiketohet me humor ose paragjykim si “aroma e moshës” është në fakt një pjesë normale e biologjisë njerëzore dhe mund të nisë shumë më herët nga sa mendojnë shumica e njerëzve.
