Tiphaine Auzière, vajza 42-vjeçare e Zonjës së Parë të Francës, Brigitte Macron, ka bërë publike lidhjen e saj me Antoine Lecomte, një student 22-vjeçar i një shkolle biznesi në Francë.
Çifti ka ndarë në rrjetet sociale momente nga një udhëtim i përbashkët në Amsterdam, duke konfirmuar kështu raportimet që kishin qarkulluar prej disa javësh për marrëdhënien e tyre.
Në fotografitë dhe videot e publikuara, Auzière dhe Lecomte shfaqen duke vizituar qytetin dhe ekspozita të ndryshme. Sipas raportimeve të mediave franceze, ata udhëtuan drejt Holandës me një furgon dhe qëndruan në hotelin Faralda në Amsterdam.
Diferenca prej 20 vitesh në moshë mes tyre ka tërhequr vëmendjen e mediave franceze, të cilat kanë bërë paralelizma edhe me historinë personale të Brigitte dhe Emmanuel Macron, të cilët gjithashtu kanë një diferencë të konsiderueshme në moshë.
Sipas raportimeve, Auzière dhe Lecomte janë njohur gjatë verës në Le Touquet, një destinacion bregdetar në Francë i frekuentuar prej vitesh nga familja Macron.
Lecomte është nga Lille dhe, krahas studimeve, merret me sporte ujore dhe sipërmarrje në këtë sektor. Mediat franceze raportojnë se çifti ndan interesa të përbashkëta për udhëtimet, sportin dhe sipërmarrjen.
Raportohet gjithashtu se Brigitte Macron e ka mirëpritur marrëdhënien e re të vajzës së saj. Sipas revistës franceze Gala, për Zonjën e Parë rëndësi ka që vajza e saj të jetë e lumtur.
Auzière është nënë e dy fëmijëve nga marrëdhënia e saj e mëparshme. Ajo është juriste e specializuar në të drejtën e punës dhe autore. Në vitin 2024 publikoi romanin e saj të parë, “Assises”.
