Gjiganti suedez i mobilieve IKEA ka njoftuar një plan të madh për uljen e çmimeve në Europë, duke investuar 1.2 miliardë euro për të rikthyer klientët që janë bërë më të kujdesshëm me shpenzimet për shkak të kostos së lartë të jetesës.
Programi parashikon ulje çmimesh deri në 25% për më shumë se 1,500 produkte në tregje të ndryshme europiane. Në Gjermani, tregu më i madh i kompanisë, çmimet janë ulur për mbi 1,500 artikuj, ndërsa ulje të ngjashme po aplikohen edhe në Britani dhe vende të tjera europiane.
Sipas drejtuesve të kompanisë, shumë familje vazhdojnë të përballen me vështirësi ekonomike dhe po shtyjnë blerjet për shtëpinë. Për këtë arsye IKEA po zgjedh të sakrifikojë një pjesë të fitimit për të rritur shitjet dhe numrin e klientëve.
Kompania thotë se uljet janë bërë të mundura falë automatizimit më të madh, ridizenjimit të produkteve dhe përdorimit më efikas të energjisë së rinovueshme.
Pas dy vitesh me rënie të të ardhurave në Europë, IKEA po përpiqet të rikthehet te imazhi i saj tradicional: produkte funksionale me çmime të përballueshme për shumicën e familjeve.
