Katër shtetas australianë, të raportuar të zhdukur pas përmbytjeve dhe rrëshqitjeve shkatërruese në Nepal, janë gjetur të gjallë nga ekipet e shpëtimit. Me rastet e fundit, numri i australianëve të shpëtuar ka arritur në gjashtë, ndërsa dhjetëra të tjerë vijojnë të rezultojnë të zhdukur.
Mes të mbijetuarve është edhe 26-vjeçari Kara Severino nga Wollongong, i cili arriti të shpëtonte duke iu bashkuar një grupi njerëzish që po largoheshin nga zona e katastrofës me një traktor.
Një tjetër australian u shpëtua të martën, ndërsa katër të tjerë u gjetën të mërkurën. Identitetet e pesë personave të fundit nuk janë bërë publike. Sipas autoriteteve, njëri prej tyre u lokalizua në Nepal, një tjetër në Kinë dhe tre jashtë zonës së prekur nga katastrofa.
Personat ishin raportuar të zhdukur pasi familjarët kishin humbur kontaktet me ta pas përmbytjeve dhe nuk kishin informacion nëse kishin arritur të mbijetonin.
Bilanci i katastrofës mbetet dramatik. Më shumë se 4,850 persona rezultojnë ende të zhdukur, mes tyre 38 australianë. Policia nepaleze ka njoftuar se numri i viktimave në vend ka arritur në 1,118, ndërsa në anën tibetiane të kufirit autoritetet kineze kanë raportuar 16 viktima dhe 546 të zhdukur.
Kryeministri australian Anthony Albanese përshëndeti lajmin për gjetjen e shtetasve të tij, duke theksuar se, mes tragjedisë, konfirmimi se disa prej të zhdukurve janë të sigurt përbën një zhvillim pozitiv. Autoritetet australiane po bashkëpunojnë me ato lokale për gjetjen e personave të tjerë.
Australia ka nisur gjithashtu dërgimin e ndihmave humanitare me avionë të forcave ajrore, ndërsa ekipe për menaxhimin e krizave janë vendosur në Nepal për të mbështetur operacionet e shpëtimit.
Mes australianëve që vijojnë të rezultojnë të zhdukur ka edhe fëmijë. Më i vogli besohet të jetë një 11-vjeçar, i cili udhëtonte së bashku me vëllain 14-vjeçar dhe prindërit e tij. Familja ndodhej në një pelegrinazh drejt malit Kailash.
Ndërkohë, operacionet e kërkim-shpëtimit vazhdojnë në disa prej zonave më të goditura të Nepalit. Rreth 12 mijë persona janë shpëtuar në pjesën qendrore të vendit, ndërsa vëmendja është përqendruar edhe te tunelet e projekteve hidroelektrike, ku dyshohet se qindra punëtorë mund të jenë bllokuar.
Në hidrocentralin Rasuvagadi, pranë kufirit me Kinën, autoritetet besojnë se 46 punëtorë ndodhen të bllokuar në një hapësirë nëntokësore brenda një tuneli. Ka ende shpresa se ata janë gjallë dhe mund të kenë rezerva ushqimi dhe uji.
Deri tani, 279 persona janë shpëtuar nga projektet hidroelektrike të goditura nga masa të mëdha akulli, shkëmbinjsh, balte dhe mbeturinash pas shembjes së një akullnaje pranë kufirit me Kinën. Të paktën 639 persona të tjerë vijojnë të rezultojnë të zhdukur në këto zona.
Ekipet nepaleze, indiane dhe kineze po punojnë për të depërtuar në rrënoja dhe tunele në kërkim të të mbijetuarve. Në hidrocentralin Upper Trishuli 3A, shpëtuesve iu deshën pothuajse gjashtë ditë vetëm për të lokalizuar tunelet e bllokuara nga sasitë e mëdha të baltës.
Përmasat e shkatërrimit janë të jashtëzakonshme. Sipas një vlerësimi paraprak të Programit të Zhvillimit të Kombeve të Bashkuara, përmbytjet dhe rrëshqitjet kanë krijuar të paktën 2.2 milionë tonë mbeturina, përfshirë pjesë ndërtesash, shkëmbinj dhe sedimente.
Operacionet e kërkim-shpëtimit vijojnë, ndërsa autoritetet po garojnë me kohën për të gjetur mijëra personat që rezultojnë ende të zhdukur dhe për të shpëtuar punëtorët që dyshohet se mund të jenë gjallë nën rrënoja.
