Presidenti amerikan Donald Trump priti sot në Shtëpinë e Bardhë homologun kinez Xi Jinping, në nisje të bisedimeve për tregtinë, sigurinë dhe inteligjencën artificiale. Para takimit, Trump vuri në dukje marrëdhënien e tyre personale, duke thënë se kanë ndërtuar një “miqësi vërtet të shkëlqyer” dhe se synojnë një marrëdhënie tregtare më të balancuar mes dy vendeve.
Xi u përqendrua te nevoja për dialog dhe besim të ndërsjellë. Ai tha se interesat e Kinës dhe SHBA-së janë të lidhura ngushtë: të dyja vendet përfitojnë nga bashkëpunimi, ndërsa humbasin nëse përfshihen në konflikt. Presidenti kinez kërkoi gjithashtu që kompanitë e vendit të tij të trajtohen në mënyrë të drejtë në Shtetet e Bashkuara.
Një vend të veçantë në deklaratat e Xi zuri inteligjenca artificiale. Sipas tij, dy fuqitë kanë përgjegjësi të sigurojnë që zhvillimi i kësaj teknologjie të mbetet nën kontrollin e njerëzve dhe t’i shërbejë mirëqenies së tyre.
Pas ceremonisë së pritjes, Trump dhe Xi nisën bisedimet dypalëshe. Në tryezë janë marrëdhëniet tregtare, Tajvani, inteligjenca artificiale, si dhe çështjet që lidhen me Iranin dhe luftën e Rusisë në Ukrainë. Deri në këtë fazë të takimit nuk është njoftuar ndonjë marrëveshje e re.
