Shërbimet amerikane të inteligjencës kanë paralajmëruar disa qeveri evropiane se Rusia po shqyrton mundësinë e sulmeve me dronë ndaj vendeve të Mesdheut, mes tyre Italia, Franca dhe Spanja.
Alarmi është raportuar nga gazeta spanjolle El Mundo dhe është përcjellë më pas nga mediat italiane, përfshirë ANSA, RaiNews, La Repubblica dhe Corriere della Sera. Sipas raportimeve, një dosje me të dhëna të inteligjencës amerikane u është dorëzuar shërbimeve partnere pas vizitës së drejtorit të CIA-s, John Ratcliffe, në Moskë më 25 gusht.
Skenari që po shqyrtohet nga shërbimet perëndimore është i rëndë: dronë rusë të tipit Gerbera mund të fshihen në kontejnerë mbi anije tregtare dhe të lëshohen nga deti, në Mesdhe. Ky lloj droni ka rreze veprimi deri në rreth 600 kilometra, peshon deri në 18 kilogramë dhe mund të mbajë një ngarkesë shpërthyese disa kilogramëshe.
Në rastin e Italisë, rreziku konsiderohet veçanërisht serioz për shkak të pozicionit gjeografik. Nga Deti Tirren, sipas mediave italiane që citojnë raportimin e El Mundo-s, pjesa më e madhe e territorit italian do të ishte brenda rrezes së veprimit të këtyre dronëve.
Objektivi, sipas të njëjtave burime, nuk do të ishte domosdoshmërisht një sulm ushtarak klasik, por një operacion i luftës hibride: krijimi i panikut, testimi i mbrojtjes ajrore të vendeve të NATO-s dhe ndikimi mbi opinionin publik në vendet që mbështesin Ukrainën.
Paralajmërimi vjen në një moment kur Evropa po përballet me një rritje të incidenteve të dyshuara hibride ruse: dronë mbi aeroporte, sabotime, sulme kibernetike dhe tentativa për të frikësuar vendet anëtare të NATO-s pa kaluar hapur pragun e luftës së drejtpërdrejtë.
Ministri i Jashtëm italian, Antonio Tajani, foli në OKB për “kërcënime hibride ruse” që rrezikojnë sigurinë evropiane, ndërsa Franca ka nisur masa të reja për mbrojtjen e infrastrukturës kritike pas paralajmërimeve për rritjen e rrezikut nga dronët dhe sulmet kibernetike.
Ndërkohë, Rusia ka intensifikuar edhe sulmet ndaj Ukrainës. Gjatë natës, Kievi dhe Odessa u goditën nga raketa ruse, ndërsa autoritetet ukrainase raportuan viktima, të plagosur dhe dëme në ndërtesa civile, përfshirë zona pranë strukturave mjekësore.
Zyrtarisht, CIA nuk ka bërë një deklaratë publike për këtë dosje. Por raportimet e mediave evropiane flasin për një alarm serioz që po qarkullon në kanalet e inteligjencës perëndimore: lufta hibride e Moskës mund të zhvendoset nga kufijtë lindorë të NATO-s drejt Mesdheut.
