Presidenti i Autoritetit Palestinez, Mahmoud Abbas, iu drejtua të enjten Asamblesë së Përgjithshme të OKB-së përmes një videoje të regjistruar, pasi Shtetet e Bashkuara nuk i dhanë vizë për të marrë pjesë në takimin në Nju Jork. Sipas tij, vizat iu mohuan edhe delegacionit palestinez, për të dytin vit radhazi. Abbas e cilësoi vendimin një masë ndëshkuese të paligjshme.
Uashingtoni e ka arsyetuar refuzimin duke akuzuar Autoritetin Palestinez dhe Organizatën për Çlirimin e Palestinës se nuk kanë përmbushur angazhimet e tyre dhe se kanë ndërmarrë veprime që dëmtojnë perspektivën e paqes. Abbas i hodhi poshtë akuzat, duke deklaruar se pala palestineze mbetet e përkushtuar ndaj së drejtës ndërkombëtare dhe zgjidhjes me dy shtete.
Në fjalimin e tij, Abbas tha se palestinezët po përballen me një nga periudhat më të rrezikshme të historisë së tyre. Ai foli për shkatërrimet dhe vuajtjet në Gaza, si edhe për zgjerimin e vendbanimeve izraelite në Bregun Perëndimor. Abbas kërkoi që faza e ardhshme e planit të paqes për Gazën të zbatohet më shpejt dhe paralajmëroi se periudha kalimtare nuk duhet të zgjatet pa një afat të qartë politik.
Në mbyllje, ai kundërshtoi zhvendosjen e palestinezëve dhe tha se askush tjetër nuk mund të vendosë për të ardhmen e tyre. “Nuk do të largohemi nga vendi ynë”, u shpreh Abbas.
