Kimberly Guilfoyle, ambasadorja e Shteteve të Bashkuara në Greqi dhe ish-e fejuara e Donald Trump Jr., është njoftuar se duhet të japë dorëheqjen nga posti diplomatik. Lajmi është konfirmuar nga zëdhënësja e re e Shtëpisë së Bardhë, Katie Zacharia, gjatë konferencës së saj të parë për shtyp.
E pyetur nga gazetarët për raportimet se presidenti Donald Trump mund ta shkarkonte Guilfoyle nga detyra, Zacharia konfirmoi se ambasadores i është kërkuar të japë dorëheqjen.
Ky është një zhvillim i rëndësishëm në administratën amerikane, duke pasur parasysh lidhjet e mëparshme familjare të Guilfoyle me presidentin Trump dhe marrëdhëniet e saj të afërta me rrethin politik republikan.
Megjithatë, nga deklarata e zëdhënëses nuk rezulton se dorëheqja është paraqitur apo se ambasadorja është larguar zyrtarisht nga detyra. Nuk është bërë e ditur as arsyeja e kërkesës për largimin e saj.
Konfirmimi erdhi gjatë një konference jashtëzakonisht të shkurtër për shtyp, në të cilën zëdhënësja e re pranoi vetëm tri pyetje nga gazetarët.
Sipas raportimit të BBC, përfundimi i menjëhershëm i konferencës shkaktoi habi të dukshme në sallë. Korrespondenti i medias britanike në Shtëpinë e Bardhë e përshkroi atë si konferencën më të shkurtër që kishte ndjekur ndonjëherë.
Largimi i kërkuar i Guilfoyle vjen pas një serie publikimesh të mediave amerikane për sjelljen e saj dhe marrëdhëniet financiare me donatorë të Partisë Republikane.
Sipas The Wall Street Journal dhe The Washington Post, një nga akuzat më serioze lidhet me pretendimin se Guilfoyle i kishte kërkuar donatorit republikan Eric Deters të paguante një faturë personale prej 100 mijë dollarësh të kartës së saj American Express, përpara konfirmimit si ambasadore në vitin 2025.
Në këmbim, sipas pretendimeve të Deters dhe mesazheve të publikuara, ajo kishte ofruar të përdorte lidhjet me administratën Trump për ta ndihmuar në çështje tatimore dhe ligjore.
Raportimet përfshijnë gjithashtu dyshime për pranimin e dhuratave të papërshtatshme, favorizimin e interesave të biznesmenëve grekë dhe kërcënime të pretenduara ndaj një zyrtari të vendit pritës.
