Presidenti amerikan Donald Trump pritet të udhëheqë xhiron e nderit në një garë të Serisë IndyCar që do të zhvillohet këtë fundjavë në rrugët e Washingtonit, në kuadër të aktiviteteve për 250-vjetorin e Shteteve të Bashkuara.
Makinat do të garojnë pranë disa prej monumenteve më të njohura të kryeqytetit amerikan, përfshirë Kapitolin dhe muzetë Smithsonian. Gara do të përfshijë 147 xhiro në një pistë rreth tre kilometra të gjatë, ndërsa makinat mund të arrijnë shpejtësi deri në 300 km/h.
Për shkak të shpejtësisë së lartë, organizatorët kanë marrë masa të veçanta sigurie, duke salduar më shumë se 200 kapakë pusetash përgjatë pistës për të parandaluar lëvizjen e tyre gjatë garës.
Trump pritet të kryejë xhiron e nderit me limuzinën e tij të blinduar, të njohur si “Bisha”, përpara se të japë sinjalin për nisjen e garës duke valëvitur flamurin e gjelbër.
Gara, e quajtur “Freedom 250 Grand Prix”, është pjesë e festimeve të 250-vjetorit të pavarësisë së SHBA-së. Masat e sigurisë do të jenë të rrepta, ndërsa spektatorët do t’i nënshtrohen kontrolleve me detektorë metalesh.
