Fshehja e ngjarjeve të rënda nga Policia e Shtetit dhe vonesa e qëllimshme në reagim po kthehen në një zakon të rrezikshëm që po dëmton besimin e qytetarëve. Disa ngjarje të njëpasnjëshme të ndodhura gjatë javëve të fundit tregojnë një realitet shqetësues, ku transparenca ndaj publikut nuk është më rregull, por një përjashtim i detyruar vetëm pasi faktet bëhen virale ose publikohen nga mediat. Kjo tendencë për të mbuluar përplasjet me armë, sulmet me eksploziv dhe dhunën ndaj të miturve ngre pikëpyetje serioze mbi integritetin e strukturave policore dhe mënyrën se si po menaxhohet rendi publik në vend.
Rasti i ndodhur në Shkallnur të Durrësit e tregon qartë këtë problem. Një sherr mes disa personave degjeneroi në përdorimin e armëve, ku një qytetar u godit me qytën e një pistolete. Ajo që e bën ngjarjen akoma më të rëndë është se në këtë konflikt u përfshi Denis Tafili, një person i kërkuar nga SPAK për trafik kokaine, si dhe një punonjës policie jashtë shërbimit.
Ngjarja ndodhi në mes të ditës, por Policia e Durrësit priti më shumë se shtatë orë për të nxjerrë një njoftim zyrtar. Reagimi erdhi vetëm natën vonë, pasi mediat kishin orë të tëra që e kishin publikuar. Kjo vonesë e çuditshme jo vetëm që i dha kohë një personi të kërkuar të largohej përsëri, por ngre dyshime se u tentua të zbutej ngjarja për shkak të përfshirjes së punonjësit të policisë.
Kjo mënyrë për t'i mbajtur ngjarjet të fshehura nuk është diçka e re. Një sasi tritoli u vendos në portën e banesës së vëllait të Julian Ballës në Shijak, i cili është gjithashtu në kërkim nga SPAK për trafik ndërkombëtar droge. Pavarësisht se bëhej fjalë për një sulm me eksploziv dhe një mesazh të qartë kërcënimi mes grupeve kriminale, policia nuk e përfshiu fare këtë ngjarje në njoftimet e saj ditore. Zbulimi i ngjarjes nga mediat disa ditë më vonë tregon se rastet që lidhen me me emra të njohur të botës së krimit po tentohen të kalojnë në heshtje, pa i dhënë publikut informacionin që i takon.
Ajo që dhemb më shumë është kur ky mosreagim apo neglizhencë prek të miturit. Videoja e dhunës ndaj një vajze 17-vjeçare në Fier tronditi gjithë vendin, por prapaskena e saj është edhe më e rëndë. Rasti ishte denoncuar në polici javë përpara se pamjet të bëheshin publike. Vajza dhe e ëma kishin treguar gjithçka, por policia e trajtoi ngjarjen thjesht si një sherr të zakontë adoleshentësh, pa i dhënë mbrojtjen dhe ndihmën e nevojshme psikologjike viktimës. Institucionet u kujtuan të veprojnë seriozisht vetëm pasi videoja u shpërnda ngado në internet dhe shkaktoi reagime të fortë popullore.
Të gjitha këto ngjarje tregojnë një zakon të rrezikshëm, Policia e Shtetit po reagon vetëm kur dështimet ose ngjarjet i dalin nga kontrolli në media. Kur shteti reagon vetëm atëherë kur një video bëhet virale apo kur mediat e nxjerrin të vërtetën në shesh, pyetja që lind është, sa ngjarje të tjera të rënda mbyllen çdo ditë në sirtarët e policisë pa u marrë vesh kurrë nga qytetarët?
