Një ngjarje e rëndë është regjistruar në fshatin Domen të Postribës, ku një banesë është përfshirë nga flakët, ndërsa dyshohet se tre persona kanë humbur jetën.
Forcat zjarrfikëse kanë gjetur trupin e pajetë të një fëmije brenda banesës së djegur, ndërsa vijojnë kërkimet për nënën dhe fëmijën tjetër, të cilët dyshohet se kanë mbetur viktima të zjarrit.
Sipas informacioneve paraprake, gruaja kishte shkuar së bashku me dy fëmijët në një banesë të vjetër dhe të pabanueshme, e cila më pas është përfshirë nga flakët. Banesa ndodhet në një zonë të thellë malore, rreth 30 minuta larg rrugës së automjeteve, çka ka vështirësuar ndërhyrjen e ekipeve të emergjencës.
Zjarrfikëset kanë mbërritur në vendngjarje, por kur kanë arritur, banesa ishte shkrumbuar pothuajse plotësisht. Sipas burimeve paraprake, terreni i vështirë dhe njoftimi i vonuar kanë penguar ndërhyrjen në kohë.
Autoritetet vijojnë operacionin e kërkim-shpëtimit dhe pritet të hedhin dritë mbi rrethanat e plota të kësaj ngjarjeje tragjike.
