Studentët protestues kanë refuzuar edhe këtë të premte ftesën e kryeministrit Edi Rama për dialog, duke përmbysur blloqet e betonit të vendosura përpara Kryeministrisë me mbishkrimin “Dialog”.
Gjatë protestës, të rinjtë kanë rrëzuar blloqet e betonit dhe u kanë vënë flakën shiltave të vendosura pranë tyre, ndërsa kanë vijuar thirrjet për dorëheqjen e kreut të qeverisë.
Pavarësisht ftesave të përsëritura të Ramës për t'u ulur në tryezën e bisedimeve, studentët mbeten të vendosur në qëndrimin e tyre, duke kërkuar largimin e tij nga pushteti.
Kjo është dita e 11-të e protestës studentore, e cila është shoqëruar me marshime në rrugët e Tiranës dhe tubime përpara institucioneve shtetërore.
Edhe në ditët e mëparshme, studentët kanë refuzuar nismat simbolike të kryeministrit për dialog, duke larguar karriget dhe blloqet e betonit të vendosura përpara godinës së qeverisë.
