SPAK sekuestron të tjera pasuri që u përkasin anëtarëve të organizatës kriminale të drejtuar nga Ervis Çela dhe Franc Çopja, alias Gërgyli, apo familjarëve të tyre. Pasuritë e sekuestruara kapin vlerën e 77 milionë lekëve. Konkretisht, është sekuestruar një sipërfaqe toke prej 2 mijë metrash katrorë në Sharrë, në emër të Albin Çelës, vëllait të Ervis Çelës.
Prokurorët kanë urdhëruar edhe vënien nën sekuestro të 100 për qind të kuotave të shoqërisë “Check Company Sh.p.k.”, në Rrugën e Dibrës, Tiranë, si dhe 24 automjete Volkswagen (modeli Ioniq5 dhe ID3, ID4) dhe 1 Toyota (modeli bZ3) në pronësi të kësaj kompanie. Sipas SPAK, kompania është në emër të Franc Canajt, që rezulton të jetë kunati i Ervis Çelës.
Anëtarët e organizatës kriminale janë duke u hetuar për trafik kokaine, pastrim parash dhe grup kriminal. Organizata kriminale me shtrirje të gjerë ndërkombëtare bashkëpunonte me grupe të tjera kriminale për të lehtësuar transportet e lëndëve narkotike drejt porteve evropiane dhe investonte fitimet e mëdha në prona dhe biznese në Shqipëri dhe jashtë saj.
Sipas prokurorisë, hetimet u bazuan në analizën e të dhënave të komunikimit të enkriptuara të platformës SkyECC. Nga këto hetime janë zbuluar dërgesa shumëtonëshe kokaine nga Amerika Latine drejt porteve kryesore të BE-së, përfshirë Hamburgun, Anversin etj.
Në kuadër të këtij hetimi penal janë caktuar masa të sigurimit personal ndaj 16 personave, përfshirë dhe Çelën, që u arrestua në jug të vendit dhe ndodhet në burg në Shqipëri, si dhe Franc Çopjën, i cili u arrestua në Dubai dhe u ekstradua drejt Belgjikës, ku po gjykohet për vrasje.
