Kombëtarja shqiptare është mposhtur në transfertë nga Polonia me rezultatin 2-1 në gjysmëfinalen e “play-off” për Botërorin 2026. Ndeshja e zhvilluar në Varshavë i dha fund ëndrrës së kuqezinjve për të vijuar rrugën drejt Kupës së Botës.
Pas sfidës ka reaguar trajneri Sylvinho, i cili u shpreh i zhgënjyer për rezultatin, por njëkohësisht krenar për paraqitjen e ekipit.
“Jam thellësisht i trishtuar. Si lojtar dhe si trajner nuk më pëlqen të humbas. Ishte një ndeshje që më jep kënaqësi për atë që dhamë në fushë. Ishte një kundërshtar shumë i fortë dhe jam krenar për djemtë e ekipit tim”, tha ai.
Trajneri brazilian theksoi se Shqipëria zhvilloi një pjesë të parë shumë të mirë dhe arriti të shënojë, ndërsa në pjesën e dytë skuadra pati më pak kontroll, edhe pse krijoi raste për gol.
Sylvinho shtoi se përgatitja e shkurtër ka qenë një faktor i rëndësishëm, pasi ekipi kishte vetëm pak ditë për të punuar së bashku.
“Ky është një rrugëtim dhe duhet të kemi durim. Nëse kthehemi tre vite më parë, askush nuk do ta mendonte që Shqipëria do të shkonte në Europian dhe do të ishte kaq konkurruese në kualifikueset e Botërorit. Polonia është një skuadër e mësuar me këto nivele”, u shpreh ai.
I pyetur për të ardhmen e tij pas korrikut, Sylvinho tha se tani është i fokusuar te ndeshjet e radhës, duke përmendur përballjen e ardhshme ndaj Ukrainës.
