Kosova arriti një fitore të jashtëzakonshme në Bratislavë përballë Sllovakisë, duke triumfuar me rezultatin 4-3 në gjysmëfinalen e play-off-it për Botërorin 2026. Takimi, i zhvilluar në kryeqytetin sllovak, nisi me dominim të vendasve, të cilët shënuan që në minutën e 6’ përmes Valjent.
Kuqezinjtë reaguan shpejt, dhe në minutën e 21’ Veldin Hodza realizoi një gol të bukur për të barazuar rezultatin. Megjithatë, pakujdesia në mbrojtje në fund të pjesës së parë i dha Sllovakisë golin e dytë, duke çuar rezultatin 2-1 në pushim.
Pjesa e dytë ishte e tëra në favor të Dardanëve. Në minutën e 47’ Fisnik Asllani riktheu baraspeshën, ndërsa në të 60’ Muslija realizoi një goditje perfekte për të kaluar Kosovën në avantazh. Në minutën e 72’, Hajrizi shënoi golin e katërt dhe të fitores, ndërsa në minutat shtesë Strelec realizoi për vendasit, që shërbeu vetëm për statistikë.
Me këtë fitore, Kosova vazhdon ëndrrën për Botërorin 2026 dhe në finalen e madhe të play-off-it do të presë Turqinë në Prishtinë.
