Futbolli kolumbian është tronditur nga vdekja e mesfushorit të ri Santiago Castrillón, talent i klubit Millonarios dhe i kombëtares së Kolumbisë për moshat. Futbollisti, i lindur në vitin 2007, ndërroi jetë në Bogotá pasi ishte shtruar me urgjencë në spital pas një gjendjeje të rëndë që pësoi në fushë gjatë derbit U20 kundër Independiente Santa Fe.
18-vjeçari humbi ndjenjat gjatë ndeshjes së zhvilluar të shtunën, më 21 mars, dhe u transportua menjëherë në terapi intensive në spitalin Fundación CardioInfantil të kryeqytetit kolumbian, ku luftoi për jetën deri në natën mes së shtunës dhe së dielës.
Castrillón ishte pjesë e akademisë së Millonarios që nga viti 2021 dhe konsiderohej një nga talentet më premtues të klubit. Në fillim të vitit 2026 ai kishte marrë edhe ftesën për t’u bashkuar me kombëtaren kolumbiane U19.
Klubi Millonarios reagoi me një mesazh prekës:
“Sot futbolli ndalet. Zemra blu është e thyer. Sot dhimbja na pushton, na mbush me pafuqinë dhe trishtim.”
Ngushëllime erdhën edhe nga sulmuesi i njohur Radamel Falcao, i cili shkroi se futbolli ka humbur “një djalë plot ëndrra, me talent të jashtëzakonshëm dhe me një të ardhme të ndritur”.
Vdekja e tij ka shkaktuar një valë reagimesh dhe dhimbjeje në gjithë futbollin kolumbian.
