Seanca për kryebashkiakun e Tiranës, Erion Veliaj, ku pritej që SPAK të raportonte mbi hetimet dy mujore ndaj tij, është shtyrë për ditën e martë në orën 11:30. Shkak për shtyrjen e seancës është bërë mungesa e biznesmenit Elman Abule, i cili ndodhet në arrest shtëpie dhe nuk ishte i pranishëm në sallë.
Veliaj u arrestua më 10 shkurt në ambientet e Bashkisë së Tiranës si i dyshuar për disa vepra penale të rënda: “Korrupsioni pasiv i funksionarëve të lartë shtetërorë ose të zgjedhurve vendorë”, kryer në bashkëpunim në 9 raste, “Pastrimi i produkteve të veprës penale ose veprimtarisë kriminale”, si dhe “Fshehja ose deklarimi i rremë i pasurisë dhe interesave privatë”.
Ndaj bashkëshortes së tij, Ajola Xoxa, është vendosur masa e sigurisë "detyrim paraqitje".
SPAK bën me dije se, nga hetimet paraprake, ka dalë në pah një skemë e mirëorganizuar e ngritur nga Veliaj dhe bashkëshortja e tij, me qëllim përfitimin e parregullt të fondeve publike përmes veprimeve të fshehta dhe të paligjshme.
Sipas organit të akuzës, fondet janë përvetësuar nëpërmjet mekanizmave të vendosur në funksion brenda Bashkisë së Tiranës, me synimin e përfitimeve personale dhe familjare.
