Kritikat e kryeministrit Edi Rama për kërkesën e Unionit të Gjyqtarëve për rritje pagash, mesa duket janë të ‘papërfillshme’ për kryetaren e Gjykatës Kushtetuese, Holta Zaçaj, e cila jo vetëm që nuk është ndjerë në presion, por i ka quajtur si të zakonshme dhe brenda kuadrit të lirisë së shprehjes në demokraci.
“Deklaratat e tilla janë të zakonshme dhe i kemi parë shpesh në kontekste të ndryshme. Për sa kohë që mbeten brenda kuadrit të lirisë së shprehjes, ato janë pjesë e demokracisë dhe një vlerë e shtuar,” tha ajo.
Zaçaj jo vetëm nuk shprehur pendesë për të tërrhequr kërkesën, por nënvizoi gjithashtu se Gjykata Kushtetuese funksionon në mënyrë të pavarur dhe se politika mban kosoto kur nuk zbaton vendimet e saj.
“Zbatimi i vendimeve të GJK tregon nivelin e demokracisë. Kemi ende punë për të bërë, por në shumicën e rasteve vendimet tona janë të zbatueshme. Politika mban koston për moszbatimin e tyre,” deklaroi ajo.
Kujtojmë se Unioni i Gjyqtarëve ka kërkuar për herë të dytë brenda tre viteve rritje të pagave, kërkesë që më parë është pranuar nga vetë Gjykata Kushtetuese. Kryeministri Rama e kundërshtoi publikisht këtë kërkesë, duke shprehur shpresën që një vendim i tillë mos të përsëritet.
Në pamje të parë duket se është një përplasje e re që po krijohet mes dy pushteteve në vend. Por mbetet për t’u parë se sa reale do jetë. Sepse koha e ka treguar që kryeministri ishte i vetmi që doli kundër edhe kur deputetët kërkuan rritje pagash, por që në fund u la dorë të lirë të rrisin pagat me dyfishin e atyre që kishin.
